Kinta, 30 Janeiru 2020 15:10

[FALSU] Deskonfia Suspeitu Virus Corona, HNGV Izola Membru F-FDTL Ida Featured

Autor
Rate this item
(0 votes)

Ema barak iha mundu inklui Timor-Leste oras ne’e sente paniku ho Virus Corona. Maske Virus Corona ne’e mosu iha Wuhan, China, maibé halo ema barak sente preokupa tebes. Iha Timor-Leste rasik maske seidauk detekta ema ruma afeta ona hosi virus ne’e, maibé governu hahu halo ona intervensaun balun hodi koloka pessoal mediku sira iha aeroportu no fronteira terestre sira hodi halo check ba sidadaun Xineza sira inklui Timor oan sira ne’ebé foin fila hosi China.

Virus Corona oras ne’e la’ós nu’udar issue domestika iha China, maibé nu’udar ona issue global ne’ebé halo sidadaun global sira mós prokupa hotu. Liliu media sira tantu media públiku no privadu sira mós sempre fó atensaun maka’as.

Nune’e, iha loron Kinta 30 Janeiru 2020, Head Line Jornal Diariu INDEPENDE kona-bá Virus Corona. Notisia INDEPENDENTE katak Deskonfia Suspeitu Virus Corona, HNGV Izola Membru F-FDTL ida. Notisia ne’e interesante tebes, maibé infelizmente la konfirma didi’ak ho parte relevante sira. Liliu pessoal mediku sira iha HNGV no mediku F-FDTL nian seidauk fó sai informasaun loloos, INDEPENDENTE ho lalais no ansi públika ona notisia ne’e iha Head Line hodi ikus mai halo notisia ne’e laiha koneksaun ho realidade no faktu sira ne’ebé akontese. Notisia ne’e mós halo ema barak hasai foto hodi fahe tutan tan iha plata forma media sosial hanesan Facebook. Notisia ne’e sai viras tebes iha Facebook tanba ema barak mak hahu fahe tutan ba malu.

Liu de’it oras balun nia laran, kanal YouTube KLIBUR POST públika tutan notisia ne’e hodi manipula tiha membru F-FDTL sira nia foto balun iha momentu halo doasaun ran.

Nune’e, Fact-Checker Timor-Leste kategoriza notisia ne’e falsu, tanba faktu loloos hatudu katak to’o oras ne’e parte Hospital Nasionál Guido Valadares (HNGV) seidauk detein ema ida tanba afeta hosi Virus Corona, no parte mediku hosi instituisaun F-FDTL mós públikamente deklara ona ba públiku sira nia membru ne’ebé foin fila hosi China ne’e la afeta Virus Corona.

Tuir ID Facebook Buena Fe atual Segundo Tenente Da Marinha Dr. Elvis Eugenio Gomes katak notisia Head Line INDEPENDENTE edisaun 30 Janeiru 2020 la loos, tanba la bazeia ba faktu.

“Husu ba publico katak lalika fiar info nebe fo sai ih Media nee, claro que Ami izola duni membro ida nebe foin fila husi China nee hanesan asaun preventivo Ida tmb seja quien for see deit mak mai husi Area endemica Tenki karantina durante 14 dias la significa katak ema nee hetan moras mb dala ida tan hanesan asaun preventiva e atu hatete deit katak hau mak Medico Direita nb akompanha halo Medical Check up ami halo ona ba Ami nia membro nee e atu deklara deit ba publico katak ami nia membro nee diak hela e laiha problema saude nb ligado ho virus Corona..Obrigado Wain ba ita boot sira Nia atensaun.. Grande Abracos”.
Dr. Elvis Eugenio Gomes
Segundo Tenente Da Marinha.

Antes ne’e mós iha loron Kuarta 29 Janeiru 2020, Grupu Médiku (The 8th China-aided Medical Team Held), hamutuk ho Hospital Nasionál Guido Valadares (HNGV), hala’o konferénsia imprensa hodi ko’alia kona-ba Pneumonia ne’ebé hadaet husi Vírus Corona. Iha konferénsia hateten katak seidauk iha kazu hanesan ne’e ‘moras hada’et husi Vírus Corona’ iha Timor-Leste.
Konferésia ne’e partisipa mos husi Kapitaun Grupu Médiku (The 8th China-aided Medical Team Held) Li Musheng, ICU Dr. Huandan no Vise-Prezidente HNGV, Dr. Flavio.

Reklama husi : Jornal Diariu INDEPENDENTE
Fact-Check : FALSU

Links:

https://www.facebook.com/photo.php?fbid=2694870990631153&set=p.2694870990631153&type=1&theater

https://timornews.tl/TL/Notisia/3051?fbclid=IwAR0mTCVuxHGp9u9BBZXFAMwElrTNPORqjWkNohl8CwX-7rjfvvxbB3BkXec

 

Lee na'in: 2513 ... Atualizadu iha Kinta, 30 Janeiru 2020 15:27