Sexta, 28 Febreiru 2020 12:53

[FALSU] Pasiente Virus Corona Konsulta Iha Klinika Formosa Featured

Autor
Rate this item
(0 votes)

Dili – Durante loron hirak nia laran ema balun fahe informasaun liu husi Short Message Service (SMS) ba telemovel no ikus mai mosu iha Facebook Messengger no WhatsApp kona-bá virus corona tama ona iha Dili.

Konteudu SMS ne’e husu atensaun ba sidadaun sira katak tenke koidadu, tanba virus ne’e tama ona iha Dili, no pasiente ne’ebé kona virus ne’e halo hela tratamentu saúde iha Klinika Formosa, Dili. Konteudu SMS ne’e mós husu ba sidadaun sira atu labele halo konsulta iha Klinika Formosa, no di’ak liu ba konsulta iha fatin seluk.

Tuir mai SMS badak ne’ebé Verifika Faktus Timor-Leste asesu:

“Atensaun,deteta ona moras corona iha dili,no halo hela tratamentu iha klinik formosa..hotu2 lao uza masker...agora pasiente iha hela klinik formosa ka centro, se mak atu ba konsulta iha neba karik,se bele muda ba klinik seluk...labele ariska vida tanba moras ne daet husi anin...HAHU AGORA HOTU2 LAO UZA MASKER.”

Hafoin informasaun ne’e sirkula iha SMS ba telemovel sira no mós iha plata forma media sosial, ikus mai hetan faktu husi Ministériu Saúde no Organizasaun Mundial ba Saúde (OMS) ne’ebé hala’o investigasaun hamutuk no rezulta katak informasaun ne’ebé sirkula nu’udar informasaun FALSU, tanba faktu hatudu katak sidadaun ne’e mai husi Vietnam ne’ebé halo viajen ho ro kargo iha loron 12 Fevereiru 2020 no to’o Dili iha loron 24 Fevereiru 2020. Sidadaun ne’e laiha Virus Corona.

“Esklaresimentun ba Públiku tomak kona-ba informasaun suspeitu kazu ba COVID-19 iha Timor-Leste. Ministériu Saúde no OMS halo ona investigasaun konjuntu kona-ba kazu refere. Bazeia ba rezultadu investigasaun, ida ne’e *LAOS* suspeitu kazu ba COVID-19. Individu refere husi Vietnam no halo viajen ho roo cargo (sigla Inglés: Cargo ship) iha loron 12 Fevereiru, no to’o iha portu Dili iha loron 24 Fevereiru. Ema ne’e *LAIHA* sintomas konsitente ba COVID-19. Agora dadaun individu ne’e iha hela observasaun médiku iha roo laran. Favor disemina informasaun loloos ba públiku katak *LAIHA* kazu infesaun coronavirus iha Timor-Leste!.”

Links:

  • https://www.facebook.com/MinisteriodaSaudeTL/posts/1518293684993401
  • https://www.facebook.com/WHOTL/?__tn__=%2Cd%2CP-R&eid=ARCLWcyQFcAelubc3HXVFDmFNuBETiwZ8CyUfvzY3R89frgXP6S-wEQr1oFNX0hbjd9dx04YwazIFSpy
Lee na'in: 2150 ... Atualizadu iha Sexta, 28 Febreiru 2020 15:26