“Atu klarifika de’it katak ama ne’e seidauk mate ida. Info viral ne’ebé espalla ona dehan ama vasina mate ne’e falso. Obrigado,” katak konta facebook ho naran Morata Ranmaubere ne’ebé espalla HOAX ne’e iha pájina Timor Agora, Kuarta 30 Juñu 2021.

Maibé, tuir reportajen husi The Oe-Kusi Post (TOP) ne’ebé halo intervista ho xefe suku Lour, postu-administrativu Bobonaro, munisipiu Bobonaro katak, Hilaria de Jesus mate ona hafoin simu Astrazeneca iha aldeia Olo-Olo, suku Lour, Bobonaro iha loron Kuarta 30 Juñu 2021.

Xefe Suku, Lour Miguel Lopes hatete, ohin akontese atividade vasina iha nia suku iha aldeia Olo-Olo. Atividade vasina ne’e iha ema hamutuk nain 48 maka simu vasina AstraZeneca inklui matebian Hilaria de Jesus.

Nia hatutan, matebian Hilaria de Jesus hafoin simu vasina Covid-19 AstraZeneca ne’e, médiku sira haruka husu Hilaria tur deskansa durante minutu 30 nia laran.

“Depois nia fila ba uma la kleur mosu reasaun ran sai husi nia ibun, no iis kotu iha oras tuku 2:42 ohin,” Xefe suku Lour Miguel Lopes hateten via kontaktu telemovel ba The Oe-Kusi Post (TOP), Kuarta 30 Juñu 2021.

Hafoin konta facebook ho naran Morata Ranmaubere espalla HOAX iha plata forma media sosial, liliu iha Facebook, Verifika Faktus kontaktu kedas xefe suku Lour, Paulino Lopes Gomes hodi konfirma kona-ba assuntu ne’e, no xefe suku ne’e konsidera informasaun husi Morata Ranmaubere ne’e HOAX, tanba faktu hatudu Hilaria de Jesus mate duni hafoin simu vasina AstraZeneca. 

Nune’e mós notisia husi ajensia TATOLI katak, Hilaria mate duni ona hafoin ba simu vasina AstraZeneca.

Diretór Serbisu Saúde Munisípiu Bobonaro, João da Costa Barreto, katak molok simu vasina, pesoál saúde esplika uluk ba ema hotu-hotu kona-bá vantajen hosi vasina, iha postu vasinasaun ne’e.

“Molok fó vasina, pesoál saúde sei koko uluk matebian nia tensaun ho rezultadu normál. Tanba ne’e maka ekipa deside fó vasina. Maibé, hafoin vasina liu minutu 30, matebian fila ba uma to’o de’it iha dalan klaran ran sai-hosi inus to’o hakotu-iis,” João da Costa Barreto, hateten ba jornalista Agência Tatoli via telefónika, kuarta ne’e.

João da Costa Barreto dehan, distánsia entre postu vasinasaun ho matebian nia uma kuaze metru 300, bainhira ran sai-hosi inus no ibun, matebian sei bele hakat tama to’o nia uma laran, no família bolu ekipa saúde maibé la konsege salva tanba ran sai makás.